Amerikaning eBay kompaniyasi O‘zbekistonda soliq to‘lovchi sifatida ro‘yxatdan o‘tdi

Bugungi kunda O‘zbekistonda 64 ta xorijiy kompaniya qo‘shilgan qiymat solig‘i to‘lamoqda

Amerikaning eBay kompaniyasi O‘zbekistonda soliq to‘lovchi sifatida rasman ro‘yxatdan o‘tdi.

eBay kompaniyasi endi O‘zbekistonda QQS to‘lovchisi sifatida ro‘yxatdan o‘tdi. Bu degani, kompaniya o‘zi soliq to‘lamaydi, balki xaridorlar QQSni to‘lov narxiga qo‘shib to‘laydilar.

EBay’dan tashqari Netflix, Amazon, Google, Apple, Zoom va boshqa yirik kompaniyalar ham maxsus soliq idorasida ro‘yxatdan o‘tgan. Umuman olganda, bugungi kunda O‘zbekistonda 64 ta xorijiy kompaniya qo‘shilgan qiymat solig‘ini (QQS) to‘laydi.

2024-yilning to‘qqiz oyi davomida ushbu kompaniyalar O‘zbekistonda 850 mlrd so‘m daromad topib, qariyb 102 mlrd so‘m soliq to‘lagan. Har yili o‘sish ikki baravarni tashkil etmoqda.

Ammo bu kompaniyalar kelajakda qanday ishlashi hozircha mavhum. Sababi, yaqinda elektron tijorat bilan shug‘ullanuvchi kompaniyalar O‘zbekistonda yuridik shaxs sifatida ro‘yxatdan o‘tishlari shart etib belgilandi. eBay va Amazon kabi kompaniyalarda hozircha bunday vakolatxona mavjud emas.