Raqobat qo‘mitasi davlat xaridlarida 21 mlrd so‘mlik qonunbuzarlik holatlarini aniqladi

Toshkent shahrida 21 mlrd so‘mdan ortiq qiymatdagi davlat xaridlarida qonunbuzilishlar aniqlanib, tegishli choralar ko‘rildi. Bu haqda Raqobat qo‘mitasi ma’lum qildi.

Qo‘mita hududiy boshqarmasi tomonidan “QUYUV-MEXANIKA ZAVODI” AJ o‘tkazgan tender savdolari “Raqobat to‘g‘risida”gi qonun talablariga muvofiqligi yuzasidan o‘rganildi.

Tekshiruvlar davomida “O‘zbekiston temir yo‘llari” AJ tizimiga kiruvchi mazkur korxona tomonidan o‘tkazilgan umumiy qiymati 21 mlrd so‘mdan ortiq 8 ta tanlov savdosida qonunchilik talablariga rioya qilinmagani aniqlangan. Xususan, savdolarda raqobatni cheklovchi yoki cheklashga olib kelishi mumkin bo‘lgan holatlar qayd etilgan.

Mazkur holatlar yuzasidan qo‘mita maxsus komissiyasi tomonidan buyurtmachi tashkilotga nisbatan ish qo‘zg‘atilib, belgilangan tartibda tegishli ta’sir choralari qo‘llanildi.

Shuningdek, aniqlangan qonunbuzilishlarni bartaraf etish va kelgusida takrorlanishining oldini olish bo‘yicha majburiy ko‘rsatmalar berildi.

Qayd etilishicha, davlat xaridlari sohasida qonun ustuvorligini ta’minlash va tadbirkorlar uchun teng raqobat muhitini yaratish Raqobat qo‘mitasining ustuvor yo‘nalishlaridan biri hisoblanadi.