O‘zbekistondagi qaysi banklar eng yuqori va eng past faollikni ko‘rsatgani ochiqlandi

2026-yil I chorak yakunlariga ko‘ra, O‘zbekistonda 34 ta tijorat banki faoliyati bo‘yicha yangilangan reyting e’lon qilindi. Ularning 20 tasi yirik, 14 tasi esa kichik banklar toifasiga kiradi. Bu haqda Iqtisodiy tadqiqotlar va islohotlar markazi tadqiqotida ma’lum qilindi.

Hisobot davrida bank tizimining umumiy aktivlari 932,3 trln so‘mni ($76,3 mlrd), majburiyatlari esa 793,9 trln so‘mni ($64,9 mlrd) tashkil etdi. Sektorning sof foydasi 3,1 trln so‘mga ($254 mln) yetib, o‘tgan yilning shu davriga nisbatan 36,3% ga oshdi. Muammoli kreditlar ulushi 4,5% dan 3,3% gacha kamaydi, bu esa portfel sifati yaxshilanganini ko‘rsatadi.

Yirik banklar

Yirik banklar segmentida Kapitalbank yetakchilikni saqlab qoldi. Ushbu toifada pozitsiyalar faol qayta taqsimlanmoqda: eng katta o‘sishni Tenge Bank ko‘rsatib, birdaniga olti pog‘onaga ko‘tarildi. Xalq banki, InfinBank va Agrobank ikki pog‘onadan yuqoriladi. Shuningdek, Hamkorbank, Asia Alliance Bank va Ipak yo‘li bank ham ijobiy natija qayd etdi.

Aksincha, Orient Finans Bank besh pog‘onaga, Trast bank esa uch pog‘onaga pastladi.

Asosiy ko‘rsatkichlar tahliliga ko‘ra, moliyaviy vositachilik bo‘yicha Invest Finance Bank, Anor Bank va Kapitalbank yetakchilik qilmoqda, Davr bank va Hamkorbank esa to‘rt pog‘onadan pastladi.

Xizmatlar ommabopligi bo‘yicha Agrobank, Anor Bank va BRB birinchi uchlikka kirdi. Bu yo‘nalishda Tenge Bank sakkiz pog‘onaga ko‘tarilgan bo‘lsa, Hamkorbank yetti pog‘onaga tushdi. Kapital yetarliligi bo‘yicha Orient Finans Bank, Trast bank va Xalq banki yetakchi deb topildi.

Aktivlar sifati bo‘yicha Hamkorbank, Asia Alliance Bank va Ipak yo‘li bank yetakchi o‘rinlarni egalladi, Turon bank esa besh pog‘onaga pastladi. Boshqaruv samaradorligi bo‘yicha O‘zsanoatqurilishbank, Orient Finans Bank va NBU yetakchi bo‘ldi. Eng daromadli banklar sifatida Hamkorbank, Trast bank va Asia Alliance Bank qayd etildi, likvidlik bo‘yicha esa Asia Alliance Bank, Ipak yo‘li bank va Trast bank yetakchilik qilmoqda.

Kichik banklar

Kichik banklar segmentida TBC Bank yetakchilikni saqlab qoldi. Ushbu toifada sakkizta bank o‘z pozitsiyalarini yaxshilashga muvaffaq bo‘ldi. Eng katta o‘sish AVO Bank va Apex Bank hissasiga to‘g‘ri kelib, ular uch pog‘onadan yuqoriladi.

Saderat Bank, Garant Bank va Ziraat Bank ikki pog‘onadan ko‘tarilgan bo‘lsa, Open Bank va Uzum Bank bir pog‘onadan yuqoriladi.

Shu bilan birga, beshta bankda pasayish kuzatildi.