O‘zbekiston energetika vaziri podstansiyani tanqid qilgani sababli moliyachi ustidan shikoyat qildi

Jo‘rabek Mirzamahmudov Otabek Bakirovni haqorat qilish va obro‘sizlantirishda ayblamoqda

Energetika vaziri Jo‘rabek Mirzamahmudov moliyachi, bloger Otabek Bakirov ustidan prokuratura va IIVga shikoyat arizasi kiritdi. Bu haqda Otabek Bakirov Telegram-kanalida ma’lum qildi.

Shikoyat Bakirovning 2023-yil 5-iyun kuni “Sag‘bon” podstansiyasi bilan bog‘liq muammo haqida yozgan posti bilan bog‘liq.

Vazirning shikoyatiga ko‘ra, post mundarijasida haqorat va obro‘sizlantirish holatlari mavjud va bu bo‘yicha Otabek Bakirovga nisbatan tegishli tartibda chora ko‘rilishi lozim.

Vazir Mirzamahmudov organlarga shikoyat arizasini 2024-yil 10-oktyabr kuni taqdim etgan.

Otabek Bakirovning yozishicha, qachondir haykal qo‘yiladigan “Sag‘bon” podstansiyasi bilan bog‘liq surunkali muammo yoritilgan post 2023-yil 5-iyunda yoki 1 yil-u 7 oy avval yozilgan. Mirzamahmudov organlarga shikoyat arizasini 2024-yil 10-oktyabrda, ya’ni bir yil-u 4 oy o‘tib taqdim etmoqda.

Moliyachining so’zlariga ko‘ra, “shikoyat arizasi fuqaro Mirzamahmudov tarafidan emas, vazir Mirzamahmudov tomonidan kiritilgan”.

Ariza hozirda poytaxt IIB Kiberxavfsizlik bo‘linmasi tomonidan o‘rganilmoqda.