O‘zbekistonda arxitektorlar uchun kreativ parklar tashkil etiladi

O‘zbekistonda arxitektorlar va urbanistlar uchun maxsus kreativ parklar tashkil etiladi. Bu haqda Prezident Shavkat Mirziyoyev boshchiligida o‘tgan yig‘ilishda ma’lum qilindi.

Dastlabki kreativ park Toshkent shahrida barpo etiladi, keyinchalik bunday maydonlar boshqa hududlarda ham tashkil qilinadi. Ushbu hududlar rezidentlari uchun soliq va boshqa imtiyozlar joriy etilishi rejalashtirilgan.

Shuningdek, kadrlar tayyorlash tizimini rivojlantirish maqsadida 2026–2027-o‘quv yilidan boshlab Toshkentda urbanizatsiya, geodeziya va kadastr yo‘nalishlariga ixtisoslashgan yangi universitet faoliyat boshlaydi. Ta’lim muassasasi o‘zini o‘zi moliyalashtirish asosida ishlaydi va uning huzurida texnikum ham tashkil etiladi.

Yig‘ilishda umumiy qiymati $20 mlrdga teng yirik infratuzilma loyihalarida mahalliy pudratchilar ishtirokini kengaytirish masalasi ham ko‘rib chiqildi. Hozirda ular ko‘pincha subpudratchi sifatida qatnashayotgani qayd etildi.

Mazkur muammoni hal etish uchun mahalliy mutaxassislarni xalqaro tenderlarda ishtirok etish qoidalariga o‘rgatish, shuningdek, qurilish kompaniyalarini qo‘shni davlatlar bozorlariga bosh pudratchi sifatida chiqishini qo‘llab-quvvatlash rejalashtirilmoqda.