YeTTB “Asakabank” ning 15% ulushini sotib olish haqidagi bitimni imzoladi

Prezident 20-aprel kuni “Asakabank”ni xususiylashtirishni jadallashtirish bo‘yicha qo‘shimcha chora-tadbirlar to‘g‘risidagi qarorni imzoladi.

Hujjat bankni transformatsiya qilish, ulushni strategik investorga sotishga tayyorgarlik ko‘rish va Yevropa tiklanish va taraqqiyot bankini (YeTTB) jalb qilishni nazarda tutadi.

Qarorga ko‘ra, Iqtisodiyot va moliya vazirligi, YeTTB va “Asakabank” o‘rtasida bankning operatsion samaradorligi va kapitallashuvini oshirish, shuningdek, YeTTBning 15% ulushini sotib olish imkoniyatini nazarda tutuvchi bitim imzolangan.

Transformatsiya doirasida barcha bank operatsiyalarini bozor tamoyillariga o‘tkazish, sohaga oid bo‘lmagan funksiyalarni tugatish va aktivlar qiymatini bozor bahosiga muvofiqlashtirish (bank aksiyalarining nominal qiymatini bozor qiymatiga muvofiqlashtirishda yuzaga kelgan farqni uning qo‘shilgan kapitaliga kiritish) ko‘zda tutilgan.

Shuningdek, Iqtisodiyot va moliya vazirligiga bir oy muddatda aktivlar sifatini tahlil qilish natijasida aniqlangan muammoli kreditlar bo‘yicha yuzaga kelishi mumkin bo‘lgan yo‘qotishlarni qoplash mexanizmini joriy etish topshirildi. Buning uchun davlat budjeti mablag‘lari, shuningdek, vazirlikning bankda joylashtirilgan uzoq muddatli resurslari jalb qilinishi mumkin.

Xususiylashtirishga tayyorgarlik doirasida “Asakabank” aktivlarining bir qismi Davlat aktivlarini boshqarish agentligiga o‘tkaziladi. Xususan, gap keyinchalik xususiylashtirilishi yoki ishonchli boshqaruvga berilishi lozim bo‘lgan umumiy qiymati 382,6 milliard so‘m bo‘lgan to‘rtta loyiha haqida bormoqda:

• “Yashil energiya” — 67 mlrd so‘m;
• Uz CLAAS Agro — 222,3 mlrd so‘m;
• Khorezm Invest Project — 90,2 mlrd so‘m;
• Sayhun Tomorqa Export — 2,9 mlrd so‘m.

Bundan tashqari, muammoli aktivlarni undirish va bank aksiyalarining nominal qiymatini tuzatish mexanizmi nazarda tutilgan. Markaziy bankka risklarni boshqarish va zaxiralarni shakllantirish bo‘yicha yondashuvlarni ishlab chiqishda ishtirok etish tavsiya etildi.

Bank kapitalini mustahkamlash uchun 2026-yilda davlat budjeti hisobidan qariyb $95 mln yo‘naltirish rejalashtirilgan. Shu bilan birga, 2024−2025-yillardagi sof foyda dividendlar ko‘rinishida taqsimlanmaydi.

Bundan tashqari, Iqtisodiyot va moliya vazirligi “Asakabank”ning aktivlarining bir qismi Davlat aktivlariga o‘tkazilgandan so‘ng kamayishi mumkin bo‘lgan kapitalini tiklash huquqini oldi. Buning uchun vazirlik bankka berilgan kreditlarning qariyb 2 trln so‘mlik qismini uning ustav kapitaliga aylantira oladi. Boshqacha aytganda, davlat to‘rtta aktivni o‘tkazish uchun kompensatsiya sifatida kreditni qaytarishni talab qilmaydi.

“Asakabank”ga YeTTB bilan bitimni qo‘llab-quvvatlash va ulushni sotishga tayyorgarlik ko‘rish uchun xalqaro yuridik va moliyaviy maslahatchini (shu jumladan, “katta to‘rtlik”dan) jalb qilishga ruxsat berildi.

Iqtisodiyot va moliya vazirligi hamda “Asakabank”ka 2026-yil 1-sentabrga qadar 15% lik ulushni sotish qiymati va YeTTB bilan investitsiya bitimi shartlari bo‘yicha takliflar kiritish topshirildi.

Ijtimoiy va iqtisodiy maqsadlarni hisobga olgan holda sobiq Toshkent qishloq xo‘jaligi texnikasi zavodi hududidan foydalanish loyihasini ishlab chiqish alohida nazarda tutilgan.

2024-yil may oyida O‘zbekiston prezidenti Yevropa tiklanish va taraqqiyot banki bilan “Asakabank”ni xususiylashtirish bo‘yicha kelishuv imzolanganini ma’lum qilgandi.

“Asakabank” bugungi kunda Tiklanish va taraqqiyot jamg‘armasiga 71,09% (bir yil avval 88,22%), Iqtisodiyot va moliya vazirligiga 28,17% (10,85%), Buxoro neftni qayta ishlash zavodiga (0,59%), “O‘zavtosanoat”ga (0,08%), “O‘zagrosug‘urta”ga (0,06%) va “O‘zbekinvest”ga (0,01%) tegishli.