Xitoy kompaniyasi Yangiyo‘lda $75 mlnlik chiqindilarni qayta ishlash korxonasi quradi

O‘zbekiston va “Beijing China Science Runyu Technology Environmental Co. Ltd” Yangiyo‘l shahrida $75 mlnlik chiqindilarni qayta ishlash zavodini qurish yuzasidan memorandum imzoladi. Bu haqida Toshkent viloyati hokimligi matbuot xizmati xabar berdi. 

Loyiha faqat Yangiyo‘lni emas, balki yana beshta qo‘shni hududni — Quyichirchiq, Oqqo‘rg‘on, Chinoz, Yangiyo‘l tumanlarini ham qamrab oladi. Loyihaning texnik-iqtisodiy asoslari ishlab chiqilgan va ishchi guruh shakllantirilgan.

Yangiyo‘l hokimi Ravshan Raimov boshchiligidagi delegatsiya va kompaniya vakillari o‘rtasidagi uchrashuvda qurilish-montaj ishlari va chiqindilarni tashish uchun 100 dona maxsus texnika yetkazib berish masalalari kelishib olindi. Mazkur loyiha doirasida 250 dan ortiq yangi ish o‘rni yaratish rejalashtirilmoqda.