Yakkasaroydagi Xalq banki ofisi qayta auksionga qo‘yildi

Xalq banki Toshkent shahrining Yakkasaroy tumanidagi ofis binosini qayta auksionga qo‘ydi. Bu haqda E-auksion platformasida ma’lum qilindi.

Uch qavatli bino Kichik halqa yo’li avtomagistrali — Shota Rustaveli yo‘li va Janubiy vokzal yonida joylashgan. Obyekt maydoni 23 sotixni tashkil etib, 172-maktab ortida va tuman prokuraturasi yaqinida joylashgan.

Bino umumiy 2061 kvadrat metr, xo‘jalik maydoni esa 1644 kvadrat metrni tashkil etadi. Unda elektr ta’minoti, suv va kanalizatsiya mavjud, biroq gaz tarmog‘i ulanmagan.

Obyektning yangi boshlang‘ich narxi 27,64 mlrd so‘m etib belgilangan. Auksion 24-oktabr kuni soat 10:00 da bo‘lib o‘tadi, ishtirokchilar arizalari esa 9:00 gacha qabul qilinadi.

Lot Xalq banki boshqaruvining may oyidagi qarori asosida sotuvga qo‘yildi. Bank kim g‘olib bo‘lsa, u bilan shartnoma tuzilganidan so‘ng uch oy ichida binoni bo‘shatadi. Bank avvalroq 25 sentabrga belgilangan auksionni bekor qilgan edi.