O‘zbekistonda Xitoyning WeChat Pay tizimini mahalliy to‘lov tizimlari bilan bog‘lash rejalashtirilmoqda

23-aprel kuni O‘zbekiston Markaziy banki Xitoyning yirik texnologiya gigantlaridan biri bo‘lgan Tencent Holdings Ltd kompaniyasining sho‘ba korxonasi – Tencent Cloud International vakillari bilan uchrashuv o‘tkazdi.

Muzokaralar davomida raqamli texnologiyalar sohasida ikki tomonlama hamkorlikni kengaytirish va mamlakatda bulutli infratuzilmani rivojlantirish masalalari ko‘rib chiqildi.

Tomonlar WeChat Pay raqamli to‘lov tizimini mahalliy to‘lov tizimlari bilan integratsiyalash imkoniyatlariga, jumladan QR-kodlarni joriy etishga alohida e’tibor qaratdilar.

Uchrashuv yakunida to‘lov tizimlari sohasidagi tashabbuslar qo‘llab-quvvatlandi, shuningdek, raqamli iqtisodiyotni rivojlantirish bo‘yicha kelgusi qo‘shma harakatlar to‘g‘risida kelishuvga erishildi.

Tomonlar hamkorlikni rivojlantirishdan manfaatdor ekanliklarini tasdiqladi va birgalikdagi ishlar uchun keyingi qadamlarni belgilab oldi.