Migratsiya agentligi Rossiya kompaniyalari bilan hamkorlik shartnomalarini imzoladi

Shartnoma 7 ming nafar fuqaroni ishga joylashtirishni nazarda tutadi

Moskvadagi O‘zbekiston elchixonasida Migratsiya agentligi direktori Behzod Musayev Rossiyada faoliyat olib borayotgan 20 ga yaqin yirik kompaniyalar rahbarlari bilan uchrashuv o‘tkazdi. Bu haqda Migratsiya agentligi matbuot xizmati ma’lum qildi.

Muloqotda “ANT YAPI”, “OZON KOMYUNITI”, “PEK” va “SPAR MIDL VOLGA” kompaniyalari bilan 7000 nafar fuqaroni mazkur kompaniyalarga tashkiliy tarzda ishga joylashtirish bo‘yicha hamkorlik shartnomalari imzolandi.

Agentlik xabar berishicha, ushbu kompaniyalarning ishchilarga yaratgan sharoitlari, oylik maoshlari to‘liq o‘rganib chiqilgan. Fevral oyida hududlarda nomzodlarni saralash tadbirlari bo‘lib o‘tadi.