O‘zRTXB bitimlari yarim yilda 107,6 trln so‘mni tashkil qildi

30-iyul kuni “O‘zbekiston respublika tovar-xom ashyo birjasi” AJ 2025-yil birinchi yarim yillik yakunlari matbuot anjumanini o‘tkazdi.

Taʼkidlanishicha, yanvar-iyun oylarida birjaning barcha savdo platformalarida tuzilgan bitimlarning hajmi 2024-yilning 1-yarim yilligiga nisbatan 36,5% ga o‘sib, 107,6 trln so‘mni tashkil qildi. Tuzilgan bitimlarning qariyb 77% birja savdolariga, qolgan qismi, yaʼni 23% elektron tijorat savdo tizimlariga to‘g‘ri kelgan.

Birja savdolari bo‘yicha tuzilgan eng yirik bitimlar qishloq xo‘jaligi mahsulotlari (44%), yoqilg‘i energetika mahsulotlari (19%), qora va rangli metallar (19%), mineral o‘g‘itlar va kimyo mahsulotlari (13%) hamda qurilish mollari (5%) ulushlariga to‘g‘ri keldi.

Shuningdek, birjaning “yashil energetika seksiyasi”da “O‘zbekgidroenergo” AJ tomonidan 482,3 mln so‘mlik 34,4 mingdan ziyod yashil sertifikatlar sotildi, shu jumladan 301 ta sertifikat ilk bor eksport qilindi.