O‘zbek alifbosiga o‘zgartirishlar kiritildi

O‘zbekistonda lotin yozuviga asoslangan o‘zbek alifbosini takomillashtirishga oid qonun imzolandi. Bu haqda prezident administratsiyasi rahbari Saida Mirziyoyeva o‘zining Telegram-kanalida ma’lum qildi.

Alifboni takomillashtirish masalasi yillar davomida bahslarga sabab bo‘lib kelgan. 2023-yil 11-dekabr kuni jadidlar merosiga bag‘ishlangan konferensiyadagi nutqida u alifboni tuzatish tashabbusini ilgari surgan va bu boradagi bahslarga nuqta qo‘yish vaqti kelganini aytgan.

Mirziyoyevaning qayd etishicha, yozuvdagi noqulayliklarni bartaraf etish va o‘zbek tilining raqamli makondagi o‘rnini mustahkamlash uchun o‘zgarishlar zarur.

Hujjatlarni qayta chiqarish talab etilmaydi

Saida Mirziyoyeva o‘zgarishlar bilan bog‘liq xarajatlarni imkon qadar kamaytirishga e’tibor qaratilganini ta’kidladi.

Unga ko‘ra, amaldagi barcha hujjatlar, milliy valyuta va qimmatli qog‘ozlar o‘z kuchida qoladi. Darsliklar, peshlavhalar va ko‘rsatkichlar esa yaroqlilik muddati tugagach, bosqichma-bosqich almashtiriladi.

Mirziyoyeva qonunning 21-oktyabr kuni qabul qilinishida ramziy ma’no borligini ham qayd etdi. Uning fikricha, takomillashtirilgan alifbo yoshlarning savodxonligini oshirish, o‘zbek tilining mavqeini mustahkamlash va ma’rifatparvar ajdodlar merosiga munosib bo‘lishga xizmat qiladi.