O‘zbekistonning oltin eksporti yarim yilda 4 baravardan ko‘proqqa qisqardi

2026-yilning birinchi yarmida O‘zbekistonning oltin eksporti o‘tgan yilning mos davriga nisbatan 4 baravardan ko‘proqqa kamaydi. Bu haqda Milliy statistika qo‘mitasi ma’lum qildi.

Yanvar–iyun oylarida mamlakatning umumiy eksport hajmi $15,9 mlrdni tashkil etib, yillik hisobda 8,8% ga qisqardi. Eksportning kamayishiga asosan tashqi savdoda qimmatbaho metallar ulushining keskin pasaygani sabab bo‘ldi.

Shu bilan birga, sanoat mahsulotlari eksporti qariyb 23% ga o‘sib, $2,4 mlrdga yetdi. Xizmatlar eksportidan tushgan daromad esa 35% dan ortiq oshib, $6,19 mlrdni tashkil etdi.

Hisobot davrida O‘zbekiston $1,5 mlrdlik oltin eksport qilgan. Bu 2025-yilning shu davridagi $6,49 mlrdlik ko‘rsatkichdan 4,3 baravar kam. Oltin eksporti olti oylik tanaffusdan so‘ng aprel oyida tiklangan bo‘lsa-da, may oyidan boshlab yana to‘xtatilgan.

Jahon bozorida iyun oyida bir troya unsiya oltin narxi $4,5 mingdan $4,02 minggacha pasaydi. Iyul oyi boshida narx $4,2 mingacha ko‘tarilgan bo‘lsa, keyinchalik yana $4 ming atrofida pasayib, oyning ikkinchi yarmida $4,1 ming darajasida shakllandi.

Aprel oyidagi eksportdan avval O‘zbekiston oxirgi marta 2025-yil sentabrida $1,47 mlrdlik oltin sotgan edi. Umuman olganda, 2025-yil yakunida mamlakat rekord darajadagi — $9,9 mlrdlik qimmatbaho metallni eksport qilgan.

Joriy yil boshidan buyon Navoiy kon-metallurgiya kombinati 1,50 mln unsiya (46,9 tonna) oltin qazib oldi. Bu o‘tgan yilga nisbatan 2% kam. Shunga qaramay, ishlab chiqarishning puldagi hajmi 41,7% ga oshib, 86,2 trln so‘mga yetdi.

Iyul oyi boshida O‘zbekistonning xalqaro zaxiralari $63,75 mlrdga baholandi. Bir oy ichida ular $6,82 mlrdga kamayib, o‘tgan yil oxiridan buyon eng past darajaga tushdi. Eng katta pasayish oltin zaxiralari hissasiga to‘g‘ri kelib, ularning qiymati $5,68 mlrdga kamayib, $55,75 mlrdni tashkil etdi. Shu bilan birga, zaxiralardagi oltinning jismoniy hajmi 13,9 mln unsiya (431,7 tonna)gacha oshdi.

Jahon oltin kengashi ma’lumotlariga ko‘ra, aprel oyining oxirida O‘zbekiston Markaziy banki ichki bozorda oltin xarid qiluvchi dunyoning eng yirik regulyatorlari qatoridan joy oldi. Yil boshidan buyon Markaziy bank zaxiralarini 24 tonnaga ko‘paytirgan bo‘lib, bu ko‘rsatkich bo‘yicha faqat Polsha Milliy bankidan ortda qolmoqda.