“Navro‘z” bog‘i hunarmandlari ijara narxining oshirilishini bekor qilishni so‘rab Prezidentga murojaat qildilar

2025-yil yanvar oyidan boshlab “Navro‘z” bog‘idagi etno-uylar egalari uchun ijara haqi deyarli ikki baravar oshdi. Hunarmandlarning aytishicha, so‘nggi ikki yil ichida stavkalar 70% ga oshgan bo‘lsa, 2025-yil boshidan yana 55% ga ko‘tarildi. Natijada, umumiy o‘sish 100% dan oshib ketdi.

Hunarmandlarning ma’lumotiga ko‘ra, ijara haqi oldindan ogohlantirilmasdan oshirilgan, bu esa 150 dan ortiq usta va ularning yuzlab xodimlarining ishini xavf ostida qoldirmoqda. Ular O‘zbekiston Prezidentiga murojaat qilib, ushbu qarorni qayta ko‘rib chiqish va noyob hunarmandchilik makonini saqlab qolish bo‘yicha yordam so‘radilar.

Atelye, galereya va do‘kon egalari biznes yuritish qiyinlashib borayotganini ta’kidlamoqda. Ularning ko‘pchiligi hali ham ijara shartnomalarini olmagan. Bundan tashqari, hunarmandlar o‘zlari uchun ko‘zda tutilgan imtiyozlardan to‘liq foydalana olmayotganliklarini aytishmoqda.

Hunarmandchilik biznesi mavsumiy xarakterga ega bo‘lib, qattiq moliyaviy rejalashtirishni murakkablashtiradi, deya qayd etmoqda ustalar. Ularning fikriga ko‘ra, ijara haqi keskin oshgani tufayli faoliyatni davom ettirish qiyinlashmoqda: «Oddiy hunarmand endi oyiga $1 000–3 000 to‘lashga majbur bo‘ladi. Bunday sharoitda biznes yuritish deyarli imkonsiz bo‘lib qolmoqda».

 

Посмотреть эту публикацию в Instagram

 

Публикация от Marjona Sultonova (@nuur_by_marjona)

Etnografik qishloq 2017-yilda prezident loyihasi doirasida tashkil etilgan. 2021-yilda hunarmandlarga imtiyozlar berilib, hunarmandchilikni rivojlantirish uchun 500 mlrd so‘m ajratilgan edi. Biroq, hunarmandlarning ta’kidlashicha, ijara haqi oshirilishi ustalarning ketishiga va etnoparkning hozirgi ko‘rinishda yopilishiga olib kelishi mumkin.

Bog‘ ma’muriyati esa hozircha bu masala bo‘yicha izoh bermadi.