Latviya O‘zbekiston fuqarolariga viza berishni vaqtincha to‘xtatishni taklif qildi

Latviya Ichki ishlar vazirligi O‘zbekiston fuqarolariga viza berishni ma’lum muddatga to‘xtatishni taklif qildi. Tashabbus 29-sentabr kuni hukumat yig‘ilishida ko‘rib chiqilgan.

Vazirlik ma’lumotlariga ko‘ra, O‘zbekistonning bir necha fuqarosi Latviyaga kelganidan ko‘p o‘tmay, jumladan, voyaga yetmaganlarga qarshi bir nechta jinoyat sodir etgan.

Latviya ichki ishlar vaziri Yanis Dombrava O‘zbekiston fuqarolariga viza berishni vaqtincha to‘xtatish va shu davrda O‘zbekiston tomoni bilan hamkorlik qilib, jamoat tartibi va xavfsizligiga tahdid solishi mumkin bo‘lgan shaxslarning Latviyaga kirib kelishining oldini olishni taklif qilgan.

Biroq koalitsion hamkorlar ushbu masalani hukumat majlisi kun tartibiga kiritishni qo‘llab-quvvatlamagan. Ichki ishlar vazirligi tashabbus kelgusidagi hukumat majlislaridan birida ko‘rib chiqilishiga umid qilmoqda.

Latviyada migratsiya nazorati kuchaytirilmoqda

22-sentabr kuni Latviya hukumati Ichki ishlar vazirligi tomonidan ishlab chiqilgan migratsiyani cheklash bo‘yicha kompleks rejani ma’qullagan.

Rejada qonuniy migratsiyani tartibga solish, xorijiy talabalar ustidan nazoratni kuchaytirish, noqonuniy migratsiyaning oldini olish va deportatsiya jarayonlarini takomillashtirish bo‘yicha choralar nazarda tutilgan.

Shuningdek, 15-sentabrdan yangi Immigratsiya qonuni kuchga kirgan. Unga ko‘ra, vizalar va yashash ruxsatnomalarini berishda xavfsizlik talablari kuchaytirilgan hamda mamlakatga kirishdan oldingi nazorat kengaytirilgan.

O‘zbekiston fuqarolari Latviyaga borish uchun odatda Shengen vizasini oladi. Viza beruvchi organ safar maqsadi, taqdim etilgan hujjatlar, avvalgi safarlar va boshqa holatlarni hisobga olgan holda viza muddatini belgilaydi.