O‘zbekistonda gaz subsidiyalari 2028-yilgacha saqlanib qoladi

O‘zbekiston hukumati tariflar oshishi va avvalgi bayonotlarga qaramay, yaqin yillarda gaz narxini subsidiyalashni to‘xtatishni rejalashtirmayapti. Bu Iqtisodiyot va moliya vazirligi tomonidan e’lon qilingan 2026−2028-yillarga mo‘ljallangan Fiskal strategiyada aytilgan.

Xususan, 2025-yilda gaz ishlab chiqarish yoki sotib olishning bozor qiymati va ularning ichki bozordagi chakana narxlari o‘rtasidagi farqni qoplash uchun davlat budjetidan 7 trln so‘m ajratish taklif etilmoqda.

Bu avvalgi Fiskal strategiyada (6,4 trln) prognoz qilinganidan ko‘proq.

2026-yilda gaz subsidiyalari shaklida 5,9 trln so‘m (dastlab 4,5 trln so‘m rejalashtirilgan), 2027-yilda 5,5 trln so‘m (4,9 trln so‘m) ajratish rejalashtirilgan.

O‘tgan yilning dekabr oyida bosh vazir o‘rinbosari, iqtisodiyot va moliya vaziri Jamshid Qo‘chqorov 2028-yildan boshlab subsidiyalar amaliyotini to‘xtatish rejalashtirilganini ma’lum qilgandi.

Bu subsidiyalarni berish qachon to‘xtaydi, deb savol beradigan bo‘lsangiz, 2025−2026-yillarda bu davom etadi, 2027-yilda keskin pasayadi, nasib bo‘lsa va 2028-yildan boshlab budjetidan subsidiyalar berilmaydi, — dedi u.

Biroq, Fiskal strategiyaga ko‘ra, 2028-yilda bu maqsadda 5 trln so‘m ajratilishi ko‘zda tutilgan.

Ilgari gaz, elektr va issiqlik energiyasi uchun subsidiyalar “iqtisodiy xarajatlar” bo‘limiga kiritilgan edi. Endilikda ular “Ijtimoiy ahamiyatga ega subsidiyalar” bo‘limiga o‘tkazildi.