Avgust oyida chet el valyutasidagi kreditlarning foiz stavkasi sezilarli o‘sdi

Markaziy bank ma’lumotlariga ko‘ra, 2025-yilning yanvar oyidan avgustgacha bo‘lgan davrda chet el valyutasidagi jami bank kreditlari bo‘yicha o‘rtacha foiz stavkalari 10,2% dan 10,5% gacha oshgan.

Jami kreditlar bo‘yicha eng past stavka aprel–iyun oylarida qayd etilib, 9,9% ni tashkil qilgan. Eng yuqori ko‘rsatkich esa avgust oyida kuzatilib, 10,5% ga yetgan.

Muddatiga ko‘ra qisqa muddatli (1 yilgacha) kreditlarda foiz stavkalari mart oyida 10,6% bilan eng yuqori nuqtaga chiqqan, aprel–may oylarida esa 9,4% gacha tushgan. Avgust oyida bu ko‘rsatkich 10,1% ni tashkil etgan.

Uzoq muddatli (1 yildan ortiq) kreditlar bo‘yicha stavkalar esa iyul–avgust oylarida 10,7% ga yetib, ko‘rib chiqilgan davr mobaynidagi eng yuqori darajani qayd etgan. Eng past ko‘rsatkich esa o‘tgan yilning dekabrida 9,6% bo‘lgan.

Markaziy bank hisobotida O‘zbekiston Respublikasi Tiklanish va taraqqiyot jamg‘armasi hamda Hukumat kafolati ostidagi xorijiy kredit liniyalari mablag‘lari hisobidan ajratilgan kreditlar bo‘yicha foiz stavkalari hisobga olinmagan.