Iyul oyida O‘zbekistonning xalqaro zaxiralari hajmi $48,74 mlrdga yetdi

Iyul oyida O‘zbekistonning xalqaro zaxiralari hajmi, iyundagi biroz pasayishdan so‘ng, yana oshdi. Bu haqda Markaziy bank e’lon qilgan ma’lumotlarda keltirilgan.

1-avgust holatiga ko‘ra, regulyator zaxiralari umumiy qiymati $48,74 mlrdni tashkil etdi. Bu o‘tgan oyga nisbatan $193,7 mlnga yoki 0,4% ga ko‘p.

Markaziy bank zaxirasidagi oltin qiymati $265 mlnga oshib, $38,68 mlrdga yetdi va yana bir bor rekord darajani yangiladi. Bu o‘sish tilla miqdori o‘zgarmagan holatda (troya unsiyasi uchun 11,7 mln), qimmatbaho metall narxining oshishi hisobiga yuz berdi.

Bunga qarshi ravishda, O‘zbekistonning valyuta zaxiralari sezilarli darajada — $366,3 mlnga kamaydi. Avgust boshida ularning hajmi $8,48 mlrdni tashkil etdi. Bu summa boshqa davlatlar markaziy banklari va Xalqaro valyuta jamg‘armasidagi hisoblarda saqlanayotgan $1,05 mlrd hamda xorijdagi tijorat banklaridagi $7,42 mlrddan iborat.

Shuningdek, Markaziy bank tomonidan sotib olingan qimmatli qog‘ozlar qiymati $300 mlndan ko‘proqqa yoki 42,7% ga oshib, $1,01 mlrdga yetdi. Natijada, aksiyalar va obligatsiyalarning xalqaro zaxiralardagi ulushi 2% dan oshdi.

Kapital.uz avvalroq O‘zbekiston Markaziy banki iyun oyida ham oltinning eng yirik xaridoriga aylangani haqida xabar bergandi.