2025-yilda o‘zbekistonliklarning umumiy daromadlari real hisobda 9,2% ga oshdi

Milliy statistika qo’mitasi ma’lumotlariga ko‘ra, 2025-yilning yanvar–dekabr oylarida O‘zbekistonda aholining umumiy daromadlari 1 134,3 trln so‘mni tashkil etdi. Bu ko‘rsatkich o‘tgan yilga nisbatan nominal hisobda 18,9% ga, real hisobda esa 9,2% ga oshdi.

Aholi jon boshiga to‘g‘ri keladigan o‘rtacha umumiy daromad 29,9 mln so‘mni tashkil etib, nominal o‘sish sur’ati 16,6% , real o‘sish sur’ati esa 7,2% bo‘ldi.

Hududlar kesimida eng yuqori daromad Toshkent shahrida qayd etildi — 73,9 mln so‘m. Shuningdek, Navoiy (44,7 mln so‘m), Buxoro (35,2 mln so‘m) va Xorazm (31,1 mln so‘m) viloyatlarida ham o‘rtacha respublika darajasidan yuqori ko‘rsatkichlar kuzatildi.

Aksincha, Qoraqalpog‘iston Respublikasi (20,7 mln so‘m), Namangan (21,3 mln so‘m), Surxondaryo (22,6 mln so‘m), Jizzax (22,9 mln so‘m), Sirdaryo (23,3 mln so‘m), Qashqadaryo (23,5 mln so‘m), Samarqand (24,5 mln so‘m), Farg‘ona (24,6 mln so‘m), Andijon (26,3 mln so‘m) hamda Toshkent viloyatida (29,8 mln so‘m) aholi jon boshiga daromad respublika o‘rtacha darajasidan past bo‘ldi.

Shu bilan birga, ayrim hududlarda real daromadlar o‘sishi ham past sur’atlarda qayd etildi. Jumladan, Navoiy (7,1%), Sirdaryo (6,7%), Surxondaryo (6,5%), Samarqand (6,2%), Namangan (5,7%), Jizzax (5,0%) va Toshkent viloyatida (4,4%) real o‘sish respublika o‘rtacha darajasidan past bo‘ldi.

Eng past real o‘sish Qoraqalpog‘iston Respublikasida (3,8%) va Andijon viloyatida (0,6%) qayd etildi.

Mutaxassislar daromadlar o‘sishiga iqtisodiy faollikning ortishi, ish haqlari ko‘payishi hamda tadbirkorlik daromadlarining kengayishi ta’sir ko‘rsatganini qayd etmoqda.