Toshkentda Polsha investitsiyalar va savdo agentligi vakolatxonasi ochiladi

Polsha investitsiyalar va savdo agentligi (Polska Agencja Inwestycji i Handlu — PAIH) O’zbekistonda o’z vakolatxonasini ochishni rejalashtirmoqda. Bu haqda «Dunyo» xabar bermoqda.

O’zbekiston elchisi Amirsaid Agzamxodjayevning Polsha investitsiyalar va savdo agentligi prezidenti Andjey Dixa bilan uchrashuvida savdo-iqtisodiy sohada ikki tomonlama hamkorlik istiqbollari muhokama qilindi. O’zbekistonda Polsha kapitali ishtirokida investitsiya loyihalarini amalga oshirish imkoniyatlariga alohida e’tibor qaratildi.

Polsha investitsiya va savdo agentligi, Polsha taraqqiyot jamg’armasi (PFR) guruhining bir qismi bo’lib, xalqaro bozorlarda eksportchilar va investorlar uchun birinchi aloqasi bo’lib xizmat qiladi. Polsha tadbirkorligini rivojlantirish va targ’ib qilish bo’yicha bepul maslahatlar beradi.

Agentlikning asosiy maqsadi Polshaga to’g’ridan–to’g’ri xorijiy investitsiyalar oqimini oshirish va Polsha kompaniyalarini global darajada qo’llab-quvvatlashdir. Agentlikning Polshada ham, chet ellarda ham 56 ta vakolatxonasi mavjud.