May oyida «Octobank» barcha muammoli kreditlarni to’liq hisobdan chiqardi

May oyida xususiy «Octobank» 106 mlrd so’mlik barcha muammoli kreditlarni (NPL) hisobdan chiqardi. Bu haqda Markaziy bank ma’lumotlaridan ma’lum bo’ldi.

1 may holatiga bankning kredit portfeli 138 mlrd so’mni tashkil etdi, shundan 106 mlrd so’m muammoli kreditlar bo’ldi. 1 iyunga kelib moliya muassasasining kredit portfeli 32 mlrd so’mgacha kamaydi. Shunday qilib, muammoli kreditlar ulushi 76,9% dan 0% gacha kamaydi.

Eslatib o’tamiz, 2023-yil avgust oyida Sarvar Fayziyev 2021-yildan beri egalik qilgan «Ravnaq bank»dagi barcha 52,1% aksiyalarini sotgan. Xaridor Iskandar Tursunov bo’lib, u o’z ulushini 72%ga oshirdi.

O’sha yilning sentyabr oyida «Ravnaq bank» rasmiy ravishda o’z nomini «Octobank» deb o’zgartirdi. Moliya muassasasining bank faoliyati uchun litsenziya Markaziy bank boshqaruvi qarori bilan qayta rasmiylashtirildi.