YETTB O‘zbekistonning ikki xususiy bankiga $120 mln miqdorida kredit ajratdi

Yevropa tiklanish va taraqqiyot banki Hamkorbank va Ipak Yo‘li bankiga tadbirkorlik va ekologik loyihalarni rag‘batlantirish uchun yirik moliyalashtirish paketlarini taqdim etdi. Bu haqda tashkilot matbuot xizmati xabar berdi.

Imzolangan kelishuvlar doirasida Hamkorbank $70 mlngacha kredit liniyasini oladi. Sintetik milliy valyutada taqdim etiladigan ushbu mablag‘lar butun respublika bo‘ylab mikro, kichik va o‘rta korxonalarni kreditlash uchun ishlatiladi.

Ipak Yo‘li bankiga $50 mlngacha bo‘lgan moliyalashtirish paketi ajratilmoqda. Umumiy mablag‘ning $35 mlni xususiy sektorni qo‘llab-quvvatlashga yo‘naltirilib, bu xususiy sektorni mustahkamlash va yangi ish o‘rinlarini yaratish imkonini beradi. Qolgan $15 mln “Yashil iqtisodiyotni moliyalashtirish dasturi” (GEFF II O‘zbekiston) doirasida taqdim etiladi.

“Yashil” transh mablag‘lari Ipak Yo‘li bankiga energiya samaradorligi maqsadlari uchun kredit berishni ko‘paytirish imkonini beradi. Kompaniyalar va uy xo‘jaliklari bu mablag‘lardan ishlab chiqarishni modernizatsiya qilish va iqlim barqarorligini oshirish uchun foydalanishlari mumkin. Kreditning ushbu qismi Iqlim harakatlari bo‘yicha hamkorlik (HIPCA) tomonidan imtiyozli qo‘shma moliyalashtirish orqali qo‘llab-quvvatlanadi.

Moliyaviy institutning ta’kidlashicha, kichik va o‘rta biznes O‘zbekiston yalpi ichki mahsulotining qariyb 50% ini tashkil etadi va mehnatga layoqatli aholining deyarli 80% ini ish bilan ta’minlaydi. Hozirgi paytda YETTB mamlakat iqtisodiyotiga $6,5 mlrddan ortiq mablag‘ kiritib, 193 ta loyihani amalga oshirgan.