Xitoydan mandarin va ananas importiga vaqtinchalik ruxsat berildi

O‘simliklar karantini va himoyasi agentligi Xitoydan keltirilayotgan mandarin va ananas mevalarini 5-fevralga qadar O‘zbekistonga olib kirishga ruxsat berilganini ma’lum qildi.

Avvalroq ushbu mahsulotlar partiyalarida karantin ahamiyatiga ega bo‘lgan uch turdagi zararli organizmlar aniqlangani sababli import uchun ruxsatnomalar rasmiylashtirilishi vaqtincha to‘xtatilgan edi.

Agentlik xabariga ko‘ra, belgilangan muddatgacha Xitoy karantin xizmati tomonidan berilgan fitosertifikatlar asosida yuklarni olib kirishga ruxsat etiladi. Barcha mahsulotlardan namunalar olinib, ular fitosanitariya talablari bo‘yicha qat’iy nazoratdan o‘tkaziladi.

Qayd etilishicha, aniqlangan zararli hasharotlar O‘zbekistonda karantin obyektlari hisoblanadi, biroq inson salomatligi uchun xavf tug‘dirmaydi.

Hozirda tomonlar o‘rtasida importni xalqaro fitosanitariya talablariga mos holda davom ettirish bo‘yicha muzokaralar olib borilmoqda. 2026-yil uchun Xitoydagi bog‘lar va qadoqlash korxonalarining yangi reyestri shakllantirilishi rejalashtirilgan.

Cheklovlar sabab bo‘lgan muammolar bartaraf etilgunga qadar vaqtinchalik amal qiladi.