“China Southern Airlines” O‘zbekistonga parvozlar chastotasini ko‘paytiradi

“Uzbekistan Airports” va “China Southern Airlines” kompaniyasi o‘rtasida muzokaralar bo‘lib o‘tdi. Bu haqda “Uzbekistan Airports” 1-aprelda ma’lum qildi. 

Tashuvchi mavjud yo‘nalishlar chastotasini haftasiga yetti martagacha oshirish masalasini ko‘rib chiqmoqda. Hozirda “China Southern Airlines” aviakompaniyasi Toshkentdan Pekinga (haftasiga 4 marta) va Toshkentdan Urumchiga (haftasiga 5 marta) parvozlarni amalga oshirib kelmoqda. Shuningdek, “Uzbekistan Airports” kompaniyasi Andijon, Namangan va Farg‘ona aeroportlaridan Xitoy shaharlariga yangi yo‘nalishlarni ochishni taklif qildi.

“China Southern Airlines” —  Guanchjou shahrida joylashgan xitoy aviakompaniyasi bo‘lib, mahalliy, mintaqaviy va xalqaro reyslarni taklif etib kelmoqda.