Volkswagen brendi O‘zbekiston bozoriga kirishni rejalashtirmoqda

Germaniyaning mashhur avtomobil ishlab chiqaruvchisi Volkswagen O‘zbekiston bozoriga kirishga tayyorlanmoqda. Bu haqda Volkswagen Passenger Cars kompaniyasining savdo, marketing va sotuvdan keyingi xizmatlar bo‘yicha boshqaruv a’zosi Martin Sander o‘zining LinkedIn sahifasida ma’lum qildi.

Volkswagen O‘zbekistonda avtomobil yig‘ishni mahalliylashtirish maqsadida “O‘zavtosanoat”ning sho‘ba korxonasi — Alyans Auto bilan hamkorlik qiladi. Tomonlar O‘zbekiston Respublikasida hamkorlik bo‘yicha tegishli huquqiy shartnomani imzolagan.

Yirik uzelli yig‘in (SKD) asosida avtomobillar O‘zbekistonda yig‘iladi. Avvalgidek, “Jizzax” erkin iqtisodiy zonasi (EIZ) bu loyihaning asosiy ishlab chiqarish maydonchasi bo‘lishi kutilmoqda.

Volkswagen O‘zbekiston bozoriga kirish doirasida sakkiz turdagi sedan modelini taklif qilishni rejalashtirmoqda. Kompaniyaning bozorga chiqishi “strategik ekspansiya” sifatida baholanmoqda.

Martin Sander bu qarorni izohlab: “Brend kuchi, biz bilganimizdek, Germaniyada ishlab chiqarilgan yuqori sifatli avtomobillarni izlayotgan O‘zbekistonning o‘sib borayotgan o‘rta sinfi ehtiyojlariga to‘liq mos keladi” dedi.

Eslatib o‘tamiz, Volkswagen avval Rossiya orqali O‘zbekiston bozoriga kirishni rejalashtirgan edi. Ammo Rossiyaning Ukrainaga bostirib kirishi va bunga javoban kompaniyaning Rossiya bozoridan chiqib ketishi bu rejalarni to‘xtatdi.

Volkswagen — 1937-yilda tashkil etilgan yirik nemis avtomobil konserni bo‘lib, Golf, Passat, Beetle kabi mashhur modellarni ishlab chiqargan. Kompaniyaga Audi, Porsche, Skoda kabi global brendlar ham tegishli.

O‘zbekiston avtomobil bozorining diversifikatsiyalashayotgan bu bosqichi mahalliy iste’molchilar uchun sifatli va keng tanlovli mashinalarni taqdim etadi. Shu bilan birga, bu hamkorlik avtomobilsozlik sanoatini texnologik va investitsion jihatdan rivojlantirishga xizmat qilishi kutilmoqda.