Uzum 400 mlrd so‘mlik obligatsiyalarning ikkinchi paketini chiqaradi

Uzum ekotizimiga kiruvchi Makesense kompaniyasi Toshkent fond birjasida 400 mlrd so‘mlik obligatsiyalarni joylashtirmoqda. Bu haqda fond birjasi matbuot xizmati xabar berdi.

Qimmatli qog‘ozlar (tikker — UZUMN2B2) Makesense kompaniyasi nomidan, Uzum guruhining tarkibiy qismi sifatida chiqarilgan. Ular allaqachon birjaning kotirovka ro‘yxatiga kiritilgan, savdolar esa 3-noyabr kuni boshlanadi.

Jami 4 ming dona obligatsiya joylashtirilmoqda, ularning har birining nominal qiymati 100 mln so‘m. Qimmatli qog‘ozlarning muomalada bo‘lish muddati 2 yil (720 kun) etib belgilangan. Kupon stavkasi 24% darajasida bo‘lib, foiz to‘lovlari har 90 kunda amalga oshiriladi.

Bu Uzum guruhining ikkinchi obligatsiya emissiyasi hisoblanadi. Joriy yilning mart oyida kompaniyalar guruhi fond birjasida 300 mlrd so‘m jalb qilgan edi. O‘shanda kupon stavkasi 25% bo‘lgan va tushgan mablag‘lar fintex yo‘nalishini rivojlantirishga yo‘naltirilgan.

Kapital.uz avvalroq Uzum tarmog’ida yaqin kelajakda IPOga chiqishi va maydon sifatida London fond birjasini ko’rib chiqayotgani haqida xabar bergandi.