2026-yil yakuniga qadar Milliy investitsiya fondining 30% gacha aksiyalari IPOga chiqariladi

Shuningdek, davlat banklari kuzatuv kengashlari tarkibining 50%i mustaqil a’zolar bilan shakllantiriladi

Фото: Kapital.uz

O‘zbekiston Respublikasi Prezidenti Shavkat Mirziyoyev davlat ishtirokidagi korxonalar va tijorat banklari faoliyati samaradorligini oshirishga qaratilgan qarorni imzoladi. Bu haqda O‘zbekiston Respublikasi Adliya vazirligi matbuot xizmati xabar qildi.

Hujjatga muvofiq, davlat sektorida zamonaviy korporativ boshqaruv mexanizmlarini joriy etish rejalashtirilmoqda. Xususan, kompaniyalar va banklar kuzatuv kengashlarida mustaqil a’zolar ulushi 50% gacha yetkaziladi.

Yangi tartiblar moliyaviy siyosatni ham tartibga soladi. Endilikda fond ulushi mavjud bo‘lgan kompaniyalarga hisoblangan dividendlarni o‘z ixtiyorida qoldirish imkonini beruvchi hujjatlarni qabul qilish taqiqlanadi. Bunday tashkilotlarning moliyaviy natijalari va biznes-rejalar ijrosi to‘g‘risidagi hisobotlari Davlat aktivlarini boshqarish agentligiga faqat Milliy investitsiya fondi bilan kelishilganidan so‘ng taqdim etiladi.

Shuningdek, 2026-yil yakuniga qadar Milliy investitsiya fondi aksiyalarining 30% gacha qismi mahalliy va xalqaro fond bozorlarida birlamchi ommaviy taklif (IPO) orqali joylashtirilishi rejalashtirilgan.

Avvalroq Bloomberg agentligi Milliy investitsiya fondi boshqaruvi “Franklin Templeton” kompaniyasiga topshirilganini hamda fond 2026-yil birinchi choragidayoq London Stock Exchange va Toshkent Respublika fond birjasida IPO o‘tkazishi mumkinligini ma’lum qilgan edi.