UPayning hammuassisi Behzod Botirov Pay Way to‘lov xizmatining 74,38% aksiyalarini sotib oldi

UPayning hammuassisi Behzod Botirov Pay Way to‘lov xizmatining boshqaruv paketini sotib oldi. Bu haqdagi ma’lumot Yagona korporativ axborot portalida e’lon qilindi. 

13-fevral kuni Botirov Behzod 4,96 mlrd so‘mga Pay Wayning 45,15% aksiyasini sotib oldi, har bir qimmatli qog’ozning nominal qiymati 1000 so‘mni tashkil qildi. Shundan so‘ng, Behzod Botirov yana 29,23% aksiyani 3,21 mlrd so’mga sotib oldi. Shunday qilib, umumiy bitim summasi 8,18 mlrd so’mni tashkil etib, Botirov hozirda 74,38% aktsiyalarga egalik qiladi.

Natijada asosiy asoschi va ijro etuvchi organ rahbari Sattarov Bunyod Baxtiyrovichning ulushi 50% dan 10,49% ga kamaydi. Shunday bo‘lsa-da, u Pay Wayni boshqarishda davom etmoqda.

14-fevral kuni Pay Way o‘zining o‘zaro aloqador shaxslar ro‘yxatiga Botirov Behzod ham qo‘shildi. Shuningdek, 7-fevraldan boshlab Botirov kuzatuv kengashining a’zosi etib tayinlandi.

Yagona interaktiv davlat xizmatlari portali ma’lumotlariga ko‘ra, ilgari Pay Wayning 50% ustav fondi Sattarov Bunyod Baxtiyorovichga tegishli bo‘lgan, 35% Moskovsev Aleksey Alekseevichga, yana 15% esa Norik Vanikovichga tegishli bo‘lgan. Yagona interaktiv davlat xizmatlari portali saytida asoschilar ro‘yxati ochiqlanmagan, faqat «aksionerlar» deb ko‘rsatilgan.

Pay Way to‘lov xizmati Andijonda ro‘yxatdan o‘tgan bo‘lib, 2022-yil 29-iyuldan boshlab IT Park texnoparkining rezidenti hisoblanadi. 2024-yilning to‘qqiz oylik natijalari bo‘yicha Pay Way 1,3 mlrd so‘m foyda ko‘rsatgan.