Markaziy bank uchta bankni jarimaga tortdi va ikki to‘lov tashkiloti faoliyatini chekladi

Bank nazorati bo‘yicha qo‘mita oktabr oyida bir qator moliyaviy muassasalar tomonidan qonunchilik talablariga rioya qilinmagani uchun jarima sanksiyalarini qo‘lladi. Bu haqda Markaziy bank matbuot xizmati xabar berdi.

O‘tgan oy davomida qo‘mita yetti marotaba yig‘ilish o‘tkazib, 24 masalani ko‘rib chiqqan. Ulardan 14 tasi ruxsat berish tartib-taomillariga oid bo‘lib, ustavlarga o‘zgartishlar kiritish, yangi mikromoliyaviy tashkilotlarni (MMT) ro‘yxatga olish, rahbariyat va aksiyadorlarni almashtirish masalalarini o‘z ichiga olgan.

Qolgan 10 masala esa kredit tashkilotlarining moliyaviy holatiga taalluqli bo‘lgan. Unda regulyator ko‘rsatmalarining bajarilishi, iste’molchilar huquqlarini himoya qilish va pul yuvishga qarshi kurash masalalari muhokama qilingan.

Jinoiy yo‘l bilan olingan daromadlarni legallashtirish va terrorizmni moliyalashtirishga qarshi kurash qoidalarini buzganlik uchun uchta bank, beshta MMT va ikkita to‘lov tashkiloti jarimaga tortildi. Yana bir bank va bir to‘lov tashkiloti esa prudensial me’yorlarga rioya qilinmagani va inspeksiya jarayonida aniqlangan kamchiliklar uchun bo‘ladigan sanksiyalar haqida ogohlantirildi.

Bundan tashqari, 13-noyabrdan boshlab olti oy muddatga “Tezpay” va “National Pay” faoliyatiga cheklovlar joriy etildi. Ularga ayrim xizmatlarni ko‘rsatish, jumladan elektron to‘lovlarni qayta ishlash va pul o‘tkazmalari tizimlari orqali mablag‘ qabul qilish taqiqlangan.