O‘zbekiston, Tojikiston va Qirg‘iz Respublikasi o‘rtasida savdo maydonchasi tashkil etilishi mumkin

O‘zbekiston Respublikasi Prezidenti Shavkat Mirziyoyev 31-mart kuni Xo‘jand shahrida Tojikiston Respublikasi Prezidenti Emomali Rahmon va Qirg‘iz Respublikasi Prezidenti Sadir Japarov bilan uch tomonlama uchrashuvda ishtirok etdi.

Uchrashuvda O‘zbekistonning Qirg‘iziston va Tojikiston bilan tovar ayirboshlash hajmi o‘n karradan ziyodga oshgani qayd etildi. Bu hajmning deyarli yarmi chegaraoldi hududlarga to‘g‘ri keladi.

Shu bois chegaralardagi bojxona punktlarini kompleks modernizatsiya qilish va kengaytirish, qulay, zamonaviy savdo va logistika infratuzilmasini shakllantirish zarurligi ko‘rsatib o‘tildi.

Xususan, uch tomonlama savdo maydonchasini tashkil etish, sanoat va qishloq xo‘jaligi mahsulotlarining doimiy faoliyat ko‘rsatadigan ko‘rgazma-yarmarkasini yo‘lga qo‘yish masalasini o‘rganish taklif etildi.

Mamlakatlar o‘rtasida transport aloqalarini rivojlantirish borasidagi ishlarni davom ettirishga kelishib olindi. Bu aviaqatnovlar sonini ko‘paytirish va geografiyasini kengaytirish, chegaraoldi hududlardagi shaharlar o‘rtasida yangi avtobus yo‘nalishlarini yo‘lga qo‘yishni o‘z ichiga oladi.

«Qozog‘iston temir yo‘li» AJ ma’lumotlariga ko’ra, «QTJ» MK AJ Sari Og‘och tutashuvining o‘tkazuvchanlik qobiliyatini 50% gacha oshirish hisobiga yuk jo‘natuvchilarning barcha rejalarini to‘liq bajarish ta’minlandi. 

Shuningdek, tomonlar Transafg‘on yo‘lagini rivojlantirish bo‘yicha qo‘shma ishlarni kuchaytirish to‘g‘risida kelishib olishdi, deyiladi matbuot xizmati xabarida. 

Uchrashuv yakunida O‘zbekiston, Tojikiston va Qirg‘iziston davlat chegaralarining tutash nuqtasi to‘g‘risidagi tarixiy shartnoma imzolandi hamda uch davlat rahbarlarining Qo‘shma deklaratsiyasi qabul qilindi.