Raqamli texnologiyalar vaziri “Tencent” kompaniyasiga O‘zbekistonda ofis ochishni taklif qildi

Xitoyning “Tencent” kompaniyasi vitse-prezidenti Ma Bin O‘zbekiston Raqamli rivojlanish vazirligi rahbariyati bilan muzokaralar o‘tkazdi. Bu haqda vazirlik matbuot xizmati xabar berdi.

“Tencent” delegatsiyasi IT Park rezidentlari uchun soliq imtiyozlari, raqamli eksportni rivojlantirish choralari va xorijiy texnologiya kompaniyalarining mahalliy bozorga chiqish imkoniyatlari bilan tanishdi. Shuningdek, mehmonlarga “Uzinfocom” yagona integratorining ishi taqdim etildi.

Vazirlik rahbari Sherzod Shermatov yoshlar uchun raqamli iqtisodiyot ehtiyojlariga mos yuqori daromadli ish o‘rinlarini yaratish muhimligini ta’kidladi. Raqamli ta’lim va kasbiy rivojlanish sohasidagi hamkorlik mavzusiga to‘xtalib o‘tildi.

Uchrashuvda Markaziy Osiyo bozorlariga chiqish uchun O‘zbekistonda “Tencent” vakolatxonasini ochish tashabbusi ilgari surildi. Ishtirokchilar IT-autsorsingni tashkil etish rejalari va qo‘shma telekommunikatsiya loyihalarini muhokama qildilar.

Tencent vakillari “aqlli” shaharlar konsepsiyalari, bulutli xizmatlar, “katta ma’lumotlar” tahlili va sun’iy intellekt bo‘yicha takliflarni taqdim etdi. O‘yinlar, fintech sanoati va raqamli platformalarni rivojlantirish sohasidagi hamkorlik masalalari muhokama qilindi.

Aprel oyida Markaziy bank, Humo va Uzcard rahbariyati Tencent Holdings tarkibiga kiruvchi Tencent Cloud International delegatsiyasi bilan uchrashuv o‘tkazdi. Tomonlar Tencent kompaniyasiga tegishli WeChat Pay to‘lov tizimini mahalliy to‘lov yechimlari bilan integratsiya qilish va QR-kodlar orqali to‘lovlarni amalga oshirish masalalarini muhokama qilgan edi.