“TBC Bank Group” biznesni rivojlantirish uchun $200 mlnlik obligatsiyalarni joylashtiradi

“TBC Bank Group” $200 mlnlik obligatsiyalarni joylashtirganini e’lon qildi. Bu haqda Kapital.uz’ga bank matbuot xizmati xabar berdi.

Olingan mablag‘lar “TBC Uzbekistan” ni yanada rivojlantirishga yo‘naltiriladi.

Uch yillik sintetik obligatsiyalar so‘mda, hisob-kitoblar esa AQSH dollarida amalga oshiriladi. Kupon stavkasi so‘mda 22% etib belgilandi. Joylashtirish bosqichma-bosqich amalga oshiriladi: birinchi transh $140 mlnni tashkil etadi, qolgan $60 mlnni keyingi 12-18 oy ichida joylashtirish rejalashtirilgan. Joylashtirish maydoni Vena MTF bo‘ladi.

Mablag‘lar mahsulot turlarini kengaytirish va yangi segmentlarga, shu jumladan kichik va o‘rta biznesga chiqish uchun ishlatiladi.

2025-yilning birinchi choragida kompaniyaning kredit portfeli va daromadi o‘tgan yilning shu davriga nisbatan ikki baravar oshib, guruh umumiy daromadining 21% ini ta’minladi.