Slovakiya O‘zbekiston fuqarolari uchun vizalarni soddalashtiradi

Slovakiya O‘zbekiston fuqarolari uchun vizalar tartibini soddalashtirishga tayyor. Bu haqda Dunyo axborot agentligi xabar berdi.

O‘zbekiston Tashqi ishlar vazirligi vakillari bilan o‘tkazilgan muzokaralar yakunlariga ko‘ra, Slovakiya tomoni viza arizalarini ko‘rib chiqish muddatini uch oydan bir oyga qisqartirishga tayyorligini bildirdi. Tomonlar, shuningdek, mehnat migratsiyasi va axborot almashinuvi masalalarini ham muhokama qildi.

O‘zbekiston va Slovakiya Volvo zavodida o‘zbekistonliklarni ishga joylashtirish imkoniyatlari haqida Slovakiya Migratsiya agentligini xabardor etish borasida kelishuvga erishdi.

Bundan tashqari, bo‘lajak mehnat migrantlari uchun slovak tili bo‘yicha maxsus kurslar tashkil etish rejalashtirilmoqda. Yaqin orada ikki davlatning tegishli idoralari mehnat migratsiyasini tartibga solish, re-admissiya va aholi harakati masalalari bo‘yicha ikki tomonlama bitimlar loyihasini ishlab chiqishni boshlaydi.