O‘zbekistonga elektromobillar importi rekord darajaga chiqdi

Sentabr oyida O‘zbekistonga $114,4 mlnlik 11,5 ming dona elektromobil olib kirildi. Bu haqda Bojxona qo‘mitasi ma’lumotlarida qayd etilgan.

2025-yilning dastlabki oylarida elektromobillar importi keskin kamaygandi. Masalan, mazkur turdagi mashinalardan yanvarda 613 dona, fevralda 942 dona, martda 1,1 mingta import qilingan. Keyinchalik raqamlar aprelda 3 mingta, mayda 3,9 mingta, iyunda 4,5 mingta, iyulda 6,5 mingtaga yetgan. Avgustga kelib, xorijdan elektromobil sotib olish ulushi sezilarli oʻsdi va 8,1 mingtani tashkil etdi.

Oʻtgan oyda qiymati $43,6 mlnlik 2,4 mingta benzinda harakatlanuvchi yengil avtomobil import qilingan. Taqqoslash uchun, 2024-yil mos davrida $34,2 mlnga 1,6 mingta shunday mashinalar olib kelingan. Biroq gibrid avtomobillar importi keskin qisqargan. Sentabrda xorijdan $9 mlnga 240 dona gibrid avtomobil xarid qilingan boʻlsa, oʻtgan yilning shu davridagi koʻrsatkich $24,3 mlnga 1,4 mingtani tashkil etgan.

Umuman olganda, 2025-yil yanvar–sentabr oylarida Oʻzbekistonga $473 mlnlik 40,3 ming dona elektromobil import qilingan. Taqqoslash uchun, 2024-yilning toʻqqiz oyida $182 mlnga 16,2 mingta mazkur turdagi yengil mashinalar olib kelingan. Bunda import 2,5 baravar oʻsgani koʻrinadi.

Bojxona qoʻmitasi maʼlumotlaridan kelib chiqilsa, oʻtgan yili elektromobillar oʻrtacha $4,7 mingdan import qilingan. Joriy yildagi narx esa oʻrtacha $9,9 mingdan oshgan.

Toʻqqiz oylik hisobda benzinli avtomobillar importi ulushi kamligicha qolmoqda. Yaʼni yanvar–sentabr oylarida chet eldan 13,5 mingta, 2024-yil shu davrida 26,6 mingta benzinda yuruvchi mashinalar xarid qilingan. Toʻqqiz oylik davrda gibridlar importi ham keskin kamayganini koʻrish mumkin — 2,2 mingta (oʻtgan yil shu davrida 11,4 mingta).

Eslatib o’tamiz, sentabr oyida O‘zbekistonda avtomobillarni ekologik sertifikatlashtirish bekor qilindi. Muomalaga chiqarilayotgan mashinalarning xavfsizligi to‘g‘risidagi umumiy texnik reglament talablari asosida baholanadi.