Raqobat qo‘mitasi ruxsatsiz reklama uchun mehmonxonani jarimaga tortdi

Raqobat qo‘mitasining Navoiy viloyati hududiy boshqarmasi tomonidan viloyatda faoliyat yuritayotgan mehmonxonalarning onlayn bronlash tizimlarida joylashtirilgan ma’lumotlar o‘rganildi. Tekshiruv davomida iste’molchilarga noto‘g‘ri va chalg‘ituvchi axborot berilgan holatlar aniqlandi, deb xabar bermoqda qo’mita matbuot xizmati.

Xususan, Navoiy shahrida faoliyat yuritayotgan “UB Musteriois Asia” MCHJga tegishli mehmonxona tegishli ruxsat beruvchi hujjatlarga ega bo‘lmagan holda turli onlayn platformalarda o‘z xizmatlarini reklama qilgani ma’lum bo‘ldi.

Aniqlangan holatlar asosida Qo‘mitaning maxsus komissiyasi tomonidan korxonaga nisbatan “Reklama to‘g‘risida”gi qonun talablarini buzish alomatlari bilan ish qo‘zg‘atildi. Ish yakuniga ko‘ra, “UB Musteriois Asia” MCHJga moliyaviy jarima qo‘llash to‘g‘risida qaror qabul qilindi.

Shuningdek, aniqlangan qonunbuzarliklarni bartaraf etish va kelgusida bunday holatlarga yo‘l qo‘ymaslik maqsadida korxonaga majburiy ko‘rsatmalar berildi.