Raqobat qo‘mitasi uy-joy xaridorlariga 22 mlrd so‘mdan ortiq mablag‘ qaytarilishini ta’minladi

Raqobat qo‘mitasi 2025-yilda fuqarolardan kvartira sotib olish bilan bog‘liq 1,7 mingdan ortiq murojaatlarni qabul qildi. Bu haqda qo‘mita matbuot xizmati xabar berdi.

Murojaatlarning asosiy qismi (42,9%) uylarning taʼmir sifati bilan bog‘liq. Yana 40,8% murojaat kommunikatsiya tarmoqlari bilan bog‘liq muammolar tufayli, 16,3% holat esa uylarni o‘z vaqtida topshirilmasligi sababli murojaat qilgan.

Murojaatlarning 76%i qo‘mita tomonidan ijobiy hal etilgan. Ish natijalariga ko‘ra, iste‘molchilarga 22,1 mlrd so‘m qaytarilgan.

Quruvchilar va xaridorlar o‘rtasida shartnomalar tuzish masalalari alohida qayd etildi. O‘rganilgan 130 ta hujjatning aksariyatida obyektni topshirish muddatlari, kechikkanlik uchun penya, qayta hisoblash mexanizmlari, kvartiradan foydalanishning kafolatli muddatlari, shuningdek, nizolarni hal qilish tartibi aniq ko‘rsatilmagan.

Shartnomani bekor qilishda ko‘pincha faqat developerning manfaatlari hisobga olindi. Xususan, uy-joy sotib oluvchiga pulni qaytarish muddatlari asossiz ravishda 30−180 kundan 24−36 oygacha uzaytirilgan.

Ko‘pincha “agent” yoki “tijorat vakili” orqali tuzilgan shartnomalar quruvchining mas‘ul shaxsi imzosisiz rasmiylashtirilgan. Huquqbuzarliklar uchun majburiyatlarni bajarmagan quruvchi yuridik nuqtai nazardan javobgar bo‘lmagan.

Shuningdek, qo‘mita 120 ta turar joy majmuasi reklamasini tekshirib, ruxsatsiz yoki maxsus reyestrda ro‘yxatdan o‘tmasdan qurilayotgan bir qator obyektlarni aniqladi. Reklama beruvchi kompaniyalar jarimaga tortildi.

OAV va reklama agentliklari tegishli ruxsatnomaga ega bo‘lmagan qurilish obyektlarini reklama qilishga yo‘l qo‘yilmasligi haqida ogohlantirildi. Nazorat qiluvchi organ tahlil yakunlari bo‘yicha Qurilish vazirligi va Qurilish inspeksiyasiga bir qator takliflarni taqdim etdi.