Qirg‘izistonda ayirboshlash shoxobchalari mijozlarning pul manbasini tekshira boshlaydi

Qirg‘izistonda valyuta ayirboshlash shoxobchalari uchun yangi talablar joriy etiladi. Endilikda ayirboshlash punktlari mijozlardan, jumladan, chet elliklardan ham mablag‘larning kelib chiqishini tekshirishi shart bo‘ladi.

Qirg‘iziston Milliy banki ayirboshlash byurolari faoliyatiga doir yangilangan qoidalarni tasdiqladi. Unga ko‘ra, ayirboshlash shoxobchalari mijozlarni va ularning hujjatlarini tekshirishi, zarurat tug‘ilganda pul mablag‘larining manbasini aniqlashtirishi lozim. Shuningdek, yirik yoki noodatiy operatsiyalarga alohida e’tibor qaratiladi.

Yangi tartibga binoan, shubhali bitimlar vaqtincha to‘xtatiladi va ular haqida Markaziy bank xabardor qilinadi. Bundan tashqari, barcha valyuta ayirboshlash operatsiyalari bo‘yicha ma’lumotlar kamida besh yil davomida saqlanishi kerak bo‘ladi.

Regulyator ushbu choralarni noqonuniy daromadlarni legallashtirish va moliyaviy jinoyatlarga qarshi kurash bilan izohladi. Yangi qoidalar 14-yanvardan kuchga kiradi.