“IMC Capital’’ korxonasi “Perfectum’’ning hamkor egasiga aylandi

Mobil aloqa operatori “Perfectum’’ning ta’sischilari tarkibi o‘zgardi. Bu haqda Timurmalik Elmuradov Korxonalar va tashkilotlarning yagona davlat reyestri (KTYDR)ga tayanib xabar berdi.

2023-yilning 14-martidan buyon Abdumalik Iminov Perfectum kompaniyasining yagona egasi sifatida qayd etilgan edi. Bungacha kompaniyaning 65% aksiyalari davlatga, qolgan 35% esa xorijiy kompaniya “Amis Protrade International’’ ga tegishli edi. Biroq, Iminovning Perfectumning 100% egasi bo‘lgan aniq sanasi ma’lum emas.

Endi yangi hamkor egalar qatoriga 12,5% ulush bilan Kamron Akbarov va 37,5% ulush bilan “IMC Capital’’ qo‘shildi.

“IMC Capital’’, shuningdek, Yagona Respublika Prosessing Markazi (UZCARD) kompaniyasining asosiy egasi bo‘lgan “UCMGʻ’ kompaniyasining ham asosiy aksiyadori hisoblanadi. UZCARDning 75% ulushi “UCMGʻ’ga, qolgan 25% ulushi esa Kamron Akbarovga tegishli.

Yuridik shaxslar reyestriga ko‘ra, “IMC Capital’’ 2022-yilning 31-avgustida tashkil etilgan bo‘lib, kompaniyaning yagona aksiyadori sifatida “Berill Holding Company Limited’’ ko‘rsatilgan. Bu kompaniya 2023-yil 15-iyunda Birlashgan Arab Amirliklarida ro‘yxatdan o‘tgan.

“Perfectum’’ 1995-yilning noyabr oyida tashkil etilgan va O‘zbekistonda D-AMP raqamli standartiga ega mobil aloqa tarmog‘ini joriy qilgan birinchi operator hisoblanadi. 2001-yilda esa kompaniya CDMA standartidagi tarmoqni ishga tushirgan edi.