“Pepsi” ichimliklarini ishlab chiqaruvchi kompaniya “Baraka market” supermarketlariga egalik qiladi

Raqobat qo‘mitasi tomonidan “International Beverages Tashkent” MCHJ XKning “Urban Retail” MCHJ XKning 100% ulushlarini olish bo‘yicha arizasi qanoatlantirildi. Bu haqda qo‘mita rasmiy sahifasida ma’lum qildi. 

“International Beverages Tashkent” MCHJ XK “Pepsi”, “7UP”, “Mirinda”, “Mountain Dew”, “Adrenaline Rush” va “Lipton” savdo belgilari ostida salqin ichimliklar ishlab chiqarish faoliyati bilan shug‘ullanuvchi tashkilot hisoblanadi. 

“Urban Retail” MCHJ XK “Baraka market” savdo belgisi ostida supermarketlar tarmog‘i orqali spirtsiz salqin ichimliklar, oziq-ovqat hamda nooziq-ovqat mahsulotlar savdosi bilan shug‘ullanib keladi. 

Qo‘mitaning Maxsus komissiyasi tomonidan o‘tkazilgan tahlil natijalariga ko‘ra, mazkur bitim korporativ tarkibiy o‘zgartirish hisoblanishi va to‘g‘ridan-to‘g‘ri raqobat muhitiga ta’sir ko‘rsatmaydi.