1-iyuldan O‘zbekistonda parvozlar uchun elektron hujjat bilan ro‘yxatdan o‘tish mumkin bo‘ladi

1-iyuldan boshlab O‘zbekistondagi ichki reyslar yo‘lovchilari hujjatlarning elektron versiyalari bilan ro‘yxatdan o‘tishga imkon topadi. Bu haqda Uzbekistan Airports matbuot xizmati ma’lum qilmoqda.

Ushbu qaror Vazirlar Mahkamasi tomonidan qabul qilingan.

Yo‘lovchilar my.gov.uz sayti yoki ilovasidagi shaxsiy kabineti, shuningdek, “Ijtimoiy karta” ilovasi orqali elektron shaxsini tasdiqlovchi hujjatni ko‘rsatishlari mumkin. Ro‘yxatdan o‘tish uchun shaxsiy ma’lumotlar sahifasini ochib, uni ro‘yxatga olish peshtaxtasidagi xodimga ko‘rsatish lozim.

Faqat my.gov.uz yoki “Ijtimoiy karta” ilovalaridagi joriy ma’lumotlar qabul qilinadi — pasport yoki ID-kartaning nusxalari, fotosuratlari, skanerlangan ko‘rinishlari hamda shaxsiy ma’lumotlar aks etgan skrinshot tasvirlari ro‘yxatdan o‘tish uchun yaroqsiz hisoblanadi.