“O‘zbekneftgaz” raisi qator neft bazalari rahbarlarini ishdan oldi

“O‘zbekneftgaz” aksiyadorlik jamiyati boshqaruv raisi Abdug‘ani Sanginov neft bazalari rahbarlari va mas’ul xodimlari ishtirokida yig‘ilish o‘tkazdi, deya xabar bermoqda kompaniya matbuot kotibi Mo‘min Ibodov.

Unda neft bazalari faoliyatini sog‘lomlashtirish, moliyaviy-intizomiy holatni yaxshilash, soliq yukini optimallashtirish, ishchi-xizmatchilar uchun munosib mehnat sharoitlari yaratish hamda o‘rtacha ish haqini oshirish masalalari muhokama qilingan.

Olib borilgan o‘rganish natijasiga ko‘ra, 2025-yil davomida yo‘l qo‘ygan jiddiy kamchiliklari uchun Termiz, Jizzax, Maroqand hamda Kuchlik neft bazalari rahbarlari egallab turgan lavozimlaridan ozod etilgan.

Kompaniya saytidagi ma’lumotlarga ko‘ra, mazkur neft bazalarini quyidagilar boshqarib kelgan:

• Termiz neft bazasi — G‘ayrat Raqshanovich Norqobilov;
• Jizzax neft bazasi — Muhammadali Akbutayevich Umarov;
• Maroqand neft bazasi — Anvar Ismatullayevich Ikramov;
• Kuchlik neft bazasi — Elyor Tolib o‘g‘li Xudayshukurov.

Yig‘ilishda aholiga halollik, poklik va ochiqlik tamoyillari asosida xizmat ko‘rsatish orqali sifatli neft mahsulotlarini yetkazib berish ustuvor masalalar bo‘lishi lozimligi ta’kidlandi, deyiladi xabarda.