Oktabr oyida O‘zbekistonda uy-joy narxlari 2,4% gacha tezlashdi

Ayniqsa, Surxondaryo va Namangan viloyatlarida yil davomida 20% lik o'sish qayd etildi

O’zbekistonda oktabr oyida ko‘chmas mulk bozoridagi faollik keskin oshdi va mamlakatning barcha hududlarida ijobiy dinamika kuzatildi. Bu haqda Iqtisodiy tadqiqotlar va islohotlar markazi (ITIM) sharhida qayd etilgan.

O‘tgan oy 27,1 mingta bitim rasmiylashtirildi — bu sentabrdagi ko‘rsatkichdan 12% ko‘p. Bu so‘nggi ikki yil ichida qayd etilgan eng yuqori daraja.

Eng katta o‘sish Xorazm, Buxoro va Toshkent viloyatlarida kuzatildi — bu yerda shartnomalar soni o‘rtacha 26% ga oshgan. Surxondaryo va Sirdaryoda dinamika nisbatan sust bo‘lib, faollik mos ravishda 2% va 4% ga ko‘tarilgan.

Poytaxt mamlakatdagi barcha uy-joy operatsiyalarining qariyb 30% ini tashkil qiladi. Toshkentda savdolar bir oyda 5,3% ga oshgan, o‘tgan yilning oktabriga nisbatan esa bitimlar hajmi birdaniga 32% ga ko‘paygan.

Ikkilamchi bozor narxlari

Mamlakat bo‘yicha tayyor uy-joylar narxi yanada tezroq o‘sishni boshladi. Oktabr oyida kvadrat metr uchun o‘rtacha narx 2,4% ga ko‘tarilgan (sentabrda o‘sish 0,6% edi). Yillik ko‘rsatkichda narxlar 7,4% ga qimmatlashdi. Eng yuqori o‘sish Surxondaryo va Namangan viloyatlarida qayd etildi — bu hududlarda uy-joylar taxminan 20% ga oshgan.

Toshkentda esa vaziyat boshqacha: ikkilamchi bozordagi narxlar bir oyda deyarli o‘zgarmagan (0,7% o‘sish), o‘tgan yilga nisbatan esa 1% ga pasaygan. Eng katta tushish Mirzo Ulug‘bek va Yashnobod tumanlarida qayd etildi — narxlar 5% ga arzonlashgan.

Yangi uylar va ijara bozori

Poytaxtning birlamchi bozorida narxlar o‘sishda davom etmoqda: yil davomida kvadrat metr 2,1% ga qimmatlashdi. Eng faol o‘sish Bektemir, Yashnobod, Mirobod va Yakkasaroy tumanlarida qayd etilgan — o‘rtacha 5,5% ga.

Toshkentda ijara narxlari barqarorlashgan va o‘tgan oy darajasida qolgan — 1 kv. metr uchun $8,5. Eng qimmat tumanlar Mirobod, Yakkasaroy va Mirzo Ulug‘bek bo‘lib, bu yerda narx 1 kv. metr uchun o‘rtacha $10,2 ni tashkil etadi.

Yillik hisobda ijara narxlari 1,6% ga oshgan. Eng katta o‘sish Bektemir, Yashnobod va Sergeli tumanlarida qayd etilgan — 9%.