O‘zbekistonda naslli buzoq tug‘ilgani uchun 700 ming so‘mgacha subsidiya beriladi

O‘zbekistonda chorvachilik sohasini qo‘llab-quvvatlashning yangi tartibi joriy etiladi. U yuqori mahsuldor naslli yosh hayvonlarni yetishtirishni rag‘batlantirish va chorvadorlar uchun qo‘shimcha imtiyozlar yaratishni nazarda tutadi. Bu haqda Adliya vazirligi matbuot xizmati ma’lum qildi.

Hujjatga ko‘ra, 2026-yil 1-iyundan 2029-yil 1-yanvargacha mamlakat hududiga naslli sigirlar, qo‘ylar va echkalarni olib kirish qo‘shilgan qiymat solig‘idan ozod etiladi. Bu chorvachilik xo‘jaliklariga xorijdan yuqori mahsuldor naslli chorva importini yengillashtirishi kutilmoqda.

Shuningdek, 2026-yil 1-iyuldan 2030-yilgacha aholi ro‘yxatdan o‘tgan sigirlardan xonadon sharoitida olingan har bir naslli buzoq uchun subsidiya oladi. Sun’iy urug‘lantirish usuli orqali tug‘ilgan buzoq uchun 500 ming so‘m, embrion ko‘chirish usuli qo‘llangan holatda esa 700 ming so‘m miqdorida mablag‘ ajratiladi.

Dastur doirasida yuqori mahsuldor chorva ulushini bosqichma-bosqich 90% ga yetkazish rejalashtirilgan. Bundan tashqari, 2026–2028-yillar davomida go‘sht va sut mahsulotlarini sanoat asosida qayta ishlash darajasini 50% ga yetkazish ko‘zda tutilgan.

Chorva uchun yem bazasini mustahkamlash maqsadida kelgusi yil hosilidan boshlab paxta va bug‘doy ekish rejalashtirilgan qishloq xo‘jaligi maydonlarining yarmida yem-xashak ekinlarini yetishtirishga ruxsat beriladi. Bu chorva ozuqasi ta’minotini barqarorlashtirishga xizmat qilishi kutilmoqda.