Markaziy bank uchta yangi mikromoliya tashkilotini ro‘yxatdan o‘tkazdi

Markaziy bank mikromoliya tashkilotlari reyestriga “ADL Moliya”, “Prizma Kapital” va “Avo Finance” kompaniyalarini kiritdi. Bu haqda regulyator matbuot xizmati xabar berdi.

Barcha uchala tashkilot 2025-yil oktabr oyida ro‘yxatdan o‘tgan. “ADL Moliya” 2,5 mlrd so‘m ustav kapitaliga ega bo‘lib, moliyaviy lizing xizmatlarini ko‘rsatishga ixtisoslashgan. Kompaniyaning yagona ta’sischisi — Murad Buildings va NRG devlopment loyihalari asoschisi Murodjon Nazarov.

Qo‘qon shahrida joylashgan “Prizma Kapital”ning ustav fondi 52 mlrd so‘mni tashkil etadi. Uning egalari teng ulushlarda Nozimjon Jabborov va “Nurafshon Metan Savdo” ta’sischisi Mahmud Ahmedov hisoblanadi. Kompaniya kreditlash faoliyati bilan shug‘ullanadi.

“Avo Finance” esa AVO.uz bank guruhiga kiradi. Guruh tarkibida avval xususiylashtirilgan AVO bank ham mavjud bo‘lib, u Ruslan Adilbayev va Fonte Hedge Fund OEIC tomonidan nazorat qilinadi.

Hozirda O‘zbekistonda jami 132 ta mikromoliya tashkiloti faoliyat yuritmoqda.