Magnum do‘konlar tarmog‘i O‘zbekiston bozorida faoliyatini yakunlamoqda

Qozog‘istonning Magnum savdo tarmog‘i O‘zbekiston bozoridagi faoliyatini yakunlamoqda. Bu haqda Forbes.kz xabar berdi.

Kompaniyaning rasmiy veb-saytida Toshkentdagi oltita savdo shoxobchasi, xususan, beshta supermarket va bitta gipermarket ko‘rsatilgan. Toshkentdagi do‘konlarning bir qismi allaqachon yopilgan, qolganlarida esa qolgan mahsulotlar arzonlashtirilgan narxlarda sotilmoqda.

Magnum O‘zbekistondagi faoliyatini 2021-yil dekabr oyida 5 ming kvadrat metr maydonli birinchi gipermarketni ochish bilan boshlagan, keyinchalik esa supermarket ham ishga tushirgan edi. Dastlab, kompaniya birinchi yilda $20 mln sarmoya kiritishini va bozorga kirish uchun ikki yil tayyorgarlik ko‘rganini ma’lum qilgandi.

2023-yil avgust oyida Magnum Carrefour tarmog‘iga egalik qilgan Majid Al Futtaimning O‘zbekistondagi tuzilmasini sotib oldi va oltita do‘konga ega bo‘ldi: beshtasi Toshkentda va bittasi Samarqandda joylashgan. Bu do‘konlarning barchasi Magnum brendi ostiga o‘tishi rejalashtirilgandi. O‘sha yilning noyabr oyiga kelib, kompaniya poytaxtda yettita savdo nuqtasiga ega bo‘lgan va 2024-yilda tarmog‘ini kengaytirish rejalarini e’lon qilgandi.