“Lactalis” kompaniyasi 5,3 mlrd so‘mlik jarimaga tortildi

“Lactalis” Soliq kodeksining 227−1-moddasi bilan 5,3 mlrd so‘m jarimaga tortildi. Bu haqda 27-iyun kuni xorijiy kompaniya vakili Doniyor Najimitdinov tarmoq va sanoat assotsiatsiyalari rahbarlari bilan ochiq muloqotda ma’lum qildi.

Uning so‘zlariga ko‘ra, yaqinda “Lactalis” da soliq auditi o‘tkazilgan, natijada soliq inspektorlari bir nechta omborlarni inventarizatsiya qilishda 1,5 mln so‘mlik qadoqlangan suv kamomadini aniqlagan.

Bizning hajmimiz qariyb 1 trln so‘mni tashkil etadi. Soliqchilar 1,5 mln so‘mlik qadoqlangan suv noqonuniy sotilgan deb hisoblab, Soliq kodeksining 223 va 227-moddalarini, shu jumladan tovarlarni majburiy raqamli markirovkalash qoidalarini buzganlik uchun 5,3 mlrd so‘mlik jarima belgilashdi. Investorning hayratga tushganini aytish — bu hali hech narsa emas, deya ta’kidladi u.

Bunga javoban Savdo-sanoat palatasi raisi Davron Vahobov “Lactalis” vakiliga xorijiy investorga “jazo hamma uchun bir xil” ekanligini yetkazishni tavsiya qildi.

Najimitdinovning ta’kidlashicha, Soliq kodeksida kamomad avtomatik ravishda mahsulotni majburiy raqamli markirovkalash qoidalarini buzish deb hisoblanishi to‘g‘risidagi norma mavjud emas. Ilgari bunday holatlarda soliq organlari yetishmayotgan tovarni sotilgan deb talqin qilib, QQS hisoblagan. Biroq, raqamli markirovka joriy etilgandan so‘ng, yondashuv o‘zgardi: endi kamomad markirovka qoidalarini buzish sifatida ko‘riladi.

O‘z navbatida, “Lactalis” vakili kamomadning miqdoriy chegarasini belgilashni taklif qildi, undan oshib ketganda raqamli markirovkalash talablarini buzganlik uchun javobgarlik yuzaga keladi.

Soliqchilar bizga: agar 1 so‘m kamomad bo‘lsa, seni choraklik sof tushumning 2%i miqdorida jarimaga tortamiz, deyishdi. Qandaydir 10 ta shisha uchun hozir choraklik sof tushumning 2%i miqdorida jarimaga tortilyapmiz, — dedi Najimitdinov.

Soliq qo‘mitasi raisi Sherzod Qudbiyev “Lactalis”ga 1,5 mln so‘mlik suv yetishmovchiligi uchun raqamli markirovkalash qoidalarini buzganlik aybini qo‘yish noto‘g‘ri ekanini aytdi.

Amaldor Soliq nizolarini sudgacha hal qilish boshqarmasiga ushbu holatni alohida ko‘rib chiqishni va “Lactalis”ga qarshi hujjat tuzgan soliq inspektorini chaqirishni buyurdi.

1,5 mln so‘m kamomad uchun choraklik sof tushumning 2%i miqdorida jarima solinganda, bu hech qanday ramkaga sig‘maydi, — deya xulosa qiladi Soliq qo‘mitasi rahbari.