IFC Markaziy Osiyodagi IT startaplariga yordam berish uchun $5 mln ajratadi

Xalqaro moliya korporatsiyasi (IFC) Markaziy Osiyodagi texnologik startaplarga $5 mln sarmoya kiritmoqda. Bu haqda moliya instituti matbuot xizmati xabar beradi.

Jahon banki guruhining bir qismi bo’lgan IFC o’z mablag’larini «Sturgeon Capital» tomonidan boshqariladigan yangi «Sturgeon Emerging Opportunities II» venchur fondiga investitsiya qiladi.

Ushbu fond FinTech, kompaniyalarning o’zaro aloqalari uchun biznes platformalari (B2B), qishloq xo’jaligi texnologiyalari, sog’liqni saqlash va ta’lim loyihalari kabi turli sohalardagi startaplarni qo’llab-quvvatlaydi.

Jamg’arma, shuningdek, yosh tadbirkorlarni biznesni kengaytirish, operatsion samaradorlikni oshirish va uzoq muddatli ish bilan ta’minlash imkoniyatlarini yaratishda qo’llab-quvvatlaydi.

«Sturgeon Capital» kompaniyasining hisob-kitoblariga ko’ra, 2030 yilga kelib Markaziy Osiyo mamlakatlaridagi IT-startaplar bozori har yili $300 mlnga yaqin raqamli daromad keltirishi mumkin.

Venchur fondi Misr va Pokiston kabi boshqa rivojlanayotgan bozorlarda ham faol bo’lishni rejalashtirmoqda.

«Sturgeon» investitsiyalari rivojlanayotgan bozorlardagi venchur kapital ekotizimlaridagi moliyaviy muammolarni inkubatorlar, tezlatgichlar va fondlarga sarmoya kiritish orqali hal qilishga qaratilgan IFC «Startup Catalyst» dasturining bir qismiga aylanmoqda.

Dastur yuqori xavfli bozorlarni, shu jumladan dunyodagi eng qashshoq va zaif mamlakatlarni qamrab oladi.

2016 yilda ishga tushirilgandan beri u 24 mamlakatda 2800 tadbirkorni, shu jumladan 700 ayolni qo’llab-quvvatladi. Bunga 21 ta fondga kapital qo’yilmalar orqali erishildi.