O‘zbekiston Germaniya bilan migratsiya sohasida hamkorlik bitimini tasdiqladi

4-mart kuni O‘zbekiston prezidenti Shavkat Mirziyoyev Germaniya bilan migratsiya va mobillik sohasida har tomonlama sheriklik to‘g‘risidagi bitimni tasdiqladi.

Hujjat o‘tgan yilning 15-sentabr kuni GFR kansleri Olaf Sholsning Samarqandga tashrifi chog‘ida imzolangan edi.

Tashqi mehnat migratsiyasi masalalari bilan Vazirlar Mahkamasi huzuridagi Migratsiya agentligi shug‘ullanadi, readmissiya bilan esa Ichki ishlar vazirligi shug‘ullanadi.

25 moddadan iborat kelishuv malakali mutaxassislar, jumladan kasbiy ta’lim olayotgan talabalar, shuningdek, jurnalistlar va olimlarning adolatli harakatlanishini rivojlantirishga qaratilgan. U vaqtinchalik mehnat migratsiyasini soddalashtirish, ish, kasbiy ta’lim va malaka oshirish uchun uzoq muddatli yashashni qo‘llab-quvvatlashni nazarda tutadi.

Noqonuniy migratsiya, migrantlarni noqonuniy olib kirish, odam savdosi va majburiy mehnatga qarshi kurashish hamda jabrlanganlarni himoya qilish bo‘yicha hamkorlikka alohida e’tibor qaratilgan.

Bundan tashqari, hujjat migrantlarni uchinchi davlatlarga qaytarish uchun O‘zbekiston hududidan o‘tish masalalarini tartibga soladi.