Prezident Farmoni bilan Energiya samaradorligi milliy agentligi tashkil etildi

Vazirlar Mahkamasi huzurida Energiya samaradorligi milliy agentligi (Agentlik) tashkil etiladi. 27-mart kuni bu haqdagi Prezident Farmoni qabul qilindi. 

Agentlikning asosiy vazifasi energiya samaradorligini oshirish sohasida yagona davlat siyosatini yuritish, sohada rag‘batlantiruvchi va ta’sir etuvchi choralar ishlab chiqish va tartibga solish hisoblanadi. 

2025-yil 1-iyuldan aholi uy-joylarining energiya auditini o‘tkazish xarajatlari hamda quyosh panellari va geliokollektorlar qiymatining 20% va issiqlik nasoslari (havo, suv va geotermal) qiymatining 40% ni, lekin BHMning 50 baravaridan oshmagan miqdorda qoplash uchun Agentlik tomonidan subsidiya ajratiladi.

2025-yil 1-sentabrgacha Energiya samaradorligini oshirish raqamli platformasi ishga tushiriladi.

Agentlik huzurida byudjetdan tashqari Energiya samaradorligini rag‘batlantirish va qo‘llab-quvvatlash jamg‘armasi tashkil etiladi.

2025-yil 1-oktabrga qadar ishlab chiqaruvchilar va import qiluvchilar uchun texnologiyalar energiya samaradorligining “yashil” standartlari joriy etiladi.