Prezident Yaqin Sharqdagi vaziyat tufayli eksport yo‘nalishlarini qayta ko‘rib chiqishni buyurdi

Prezident 23-iyun kuni tashqi savdo va transport-logistika sohasi masalalari bo‘yicha yig‘ilish o‘tkazdi.

Yaqin Sharqdagi so‘nggi voqealar beqarorlikni kuchaytirgan va O‘zbekistonning tashqi iqtisodiy aloqalari hamda jahon bozorlariga chiqishiga ta’sir ko‘rsatishi mumkinligi bunga sabab bo‘ldi.

Yig‘ilishda savdo, investitsiya va transport kabi yo‘nalishlarda tezkor choralar ko‘rish zarurligi ta’kidlandi. Eksport yo‘nalishlarini xilma-xil qilish va yuklarni xavfsizroq portlarga yo‘naltirish muhimligi alohida qayd etildi. Dastlabki hisob-kitoblarga ko‘ra, bu transport xarajatlarini 30% gacha oshirishi mumkin.

Shu munosabat bilan hamkor davlatlar bilan birgalikda muqobil yo‘nalishlarni ishlab chiqish va eksportga yo‘naltirilgan korxonalarni qo‘llab-quvvatlashni kuchaytirish topshirildi. Transport vazirligi, Investitsiyalar va tashqi savdo vazirligi hamda Savdo-sanoat palatasiga tadbirkorlar bilan yaqin hamkorlikni yo‘lga qo‘yish — eksport-import operatsiyalarida ko‘maklashish va yangi bozorlarni topishda yordam berish vazifasi yuklandi.

Shuningdek, ishlab chiqarish sur’atlarini va ichki bozordagi narxlar barqarorligini saqlab qolish zarurligi ko‘rsatib o‘tildi.